Goseak berriz ere egin du GORA munduan

 

815 milioi pertsonak gosea pasatzen dute. Milioika haur daude malnutrizioaren mehatxupean.

Mozambikeko Niassa probintziako ama eta seme-alabak ortutik etxerako bidean

 

Joan zen irailaren 15ean, Elikadura eta Nekazaritzarako Nazio Batuen Erakundeak (FAO), Nekazaritza Garatzeko Nazioarteko Funtsak (NGNF), UNICEFek, Elikagaien Mundu Programak (EMP) eta Osasunaren Mundu Erakundeak (OME) elikagaien segurtasunaren eta nutrizioaren egoerari buruzko 2017ko mundu txostena aurkeztu zuten. Txostenean jasotzen denez, munduko biztanleen ehuneko 11 –815 milioi pertsona– gosea pasatzen ari dira.

Gutako gehienok oporren eta udaren amaiera eta udazkenaren etorrera onartzeko prozesuan gaudelarik, txostenak gogorarazten digu ezen, hamarkada batean etengabe murriztuz joan ondoren, goseak gora egin duela berriz ere munduan eta 2016an goseak 815 pertsonari eragin ziela –munduko biztanleen ehuneko 11–, NBEk elikagaien segurtasunari eta nutrizioari buruz argitaratu berri duen urteko txostenaren edizio berriaren arabera. Aldi berean, malnutrizio mota asko eta asko daude milioika pertsonaren osasuna arriskuan jartzen ari direnak.

Munduko ekonomiaren hazkundea ehuneko 2.7 puntutan aurreikusten denean, Eusko Jaurlaritzaren arabera gurean ehuneko 2.5 puntuko hazkundea izango delarik, munduan aurreko urtearekiko 38 milioi pertsona gosea pasatzen dute. Hazkunde hori, hein handi batean, honako hauei zor zaie: gatazka bortitzen ugaritzeari, klimarekin lotutako perturbazioei eta baita krisi ekonomikoei ere.

Adituek ohartarazten dutenez, horrenbeste indarkeria, lehorte eta uholderik –hein batean, El Niño fenomeno klimatikoarekin lotuta– ez dagoen herrialdeetan ere, munduko moteltze ekonomikoa dela eta, okerrera egin du elikagaien segurtasunak eta nutrizioak.

Gosea eta elikagaien segurtasuna

Munduan gosea pasatzen duten pertsonen zifra, 2016an, 815 milioikoa izan zen guztira. Horien artean:

Asian: 520 milioi

Afrikan: 243 milioi

Latinoamerikan eta Karibean: 42 milioi

Horrek esan nahi du munduko biztanleen ehuneko 11 gosearen biktima dela. Eta eremu geografikoen arabera:

Asia: %11,7 ;Afrika: %20 (mendebaldeko Afrikan, %33,9) Latinoamerika eta Karibea: %6,6

Hala, malnutrizio mota desberdinek zera islatzen dute:

Bost urtetik beherako 155 milioi haur inguruk desnutrizio kronikoa jasaten dute (txikiegiak dira daukaten adinerako), txostenaren arabera; bestalde, 52 milioik desnutrizio akutua pairatzen dute, eta horrek esan nahi du gutxiegi pisatzen dutela beren altuerarako. Bestaldetik, 613 milloi emakume, ugaltzeko adinean dauden emakumeen artean ehuneko 33a, anemia jota daude.

Eta hala ere, eta munduan goraka datorren desigualtasunaren isla gisa, 641 milloi pertsona, planetako pertsona heldu guztien %13, gizenegi daude. Eta bost urtetik beherako haurren artean 41 milloik gehiegizko pisua daukate.

2030 Agendako helburuak

Txostena, izatez, NBEk elikagaien segurtasunari eta nutrizioari buruz egin duen lehen ebaluazio globala da, eta Garapen Sostengarrirako 2030 Agenda ezarri ondoren argitaratu da, izan ere, 2030 Agendaren helburua 2030erako gosea eta malnutrizio mota guztiak desagerraraztea da, nazioarteko politiken lehentasun nagusietako bat izaki.

Dena dela, emaitzek alarma guztiak piztu dituzte: 2030erako gosea eta malnutrizio mota guztiak desagertuko badira, ezinbestekoa izango da elikagaien segurtasuna eta nutrizioa kaltetzen ari diren faktore guztiei heltzea, hau da, alde batetik, gatazkak, aldaketa klimatikoa, krisi ekonomikoak, baina baita ere, elikadura ohiturak.

Norberaren eginbeharrak

Hain zuzen ere, horrexegatik ezin dugu kontu hau agintarien, politikarien eta beste batzuen esku utzi; gutako bakoitzak zereginaren parte bat hartu behar du bere gain.

Alde batetik, Mundukide, Harreman, Hiruatx eta Anelkar babestuz –erakunde horiek Debagoieneko erreferenteak dira garapenerako lankidetzan–, erakundeok munduaren luze-zabalean egiten dugun lana bultzatzeko eta pertsonei nahiz kolektiboei beren gaitasunetan hobera egiten eta autokudeaketa indartzen laguntzeko.

Bestetik, eredu kooperatiboaren alde eginez, lan subiranotasunaren printzipioen alde, bazkideen berdintasunaren alde, kudeaketa demokratiko batean parte hartzearen alde, hezkuntzaren, interkooperazioaren, eraldaketa sozialaren eta elkartasun unibertsalaren alde; horixe izango baita gutxi batzuek, krisia tarteko, aberasteko aprobetxatu duten eredu kapitalistaren alternatiba.

Eta pertsona gisa, jateko, janzteko, oporretan joateko, kontsumitzeko eta, azken finean, bizitzeko era kontzienteago baten alde eginez, beste pertsona batzuk bizi ahal izan daitezen, horixe besterik ez.

Josu Urrutia Beristain _ Mundukideko zuzendaria

 

MUNDUKIDEren sare sozialetan esandakoak

  • Mundukide en Mozambique
  • Mundukide en Mozambique
  • O churrasco
  • Mistica e simbologia MST