“GGKE batek erakutsi beharko lukeen ezaugarririk garrantzitsuena konfiantza da”

 

Adrian Del Pozo Murillo, IKOko ikaslea

MUko ikasle ugari aritzen da Mundukide Fundazioan dagokion ikasketen esparruko praktikak eginaz. Batzuentzat Arrasateko egoitza izaten da lanerako kokalekua eta beste batzuk Mozanbike, Kuba eta Brasileko programetan aritzen dira adostutako lana burutuaz.

Datorren ikasturterako ere, Informatika, Komunikazio eta Enpresa alorreko 3 ikasleren lankidetza aurreikusten du Mundukidek gutxienez. Interkooperaziorako formula egokia da MU eta Mundukide Fundazioaren artean dagoena eta interesatuenak diren ikasleei garapen lankidetza sailean lanean aritzeko eskaintzen zaizkien aukera, paregabea. Ikasle eta irakasleen boluntario lana ere erabat eskertzen du Mundukidek.

Adrian Del Pozo Murillo IKOko 3. mailako ikaslea da, Arrasateko bulegoan ari da lanean eta egonaldi honetan jasotako inpresioez hitz egingo digu.

Zergatik aukeratu zenuen Mundukide, praktikaldia burutzeko?

Lehenik eta behin, irakasleek esaten digute ahalik eta irtenbide gehien probatzen saiatzeko eta ikusten nuen komunikazioarekin erlazionatutako lanbideak irtenbide errealak direla, batez ere, gauden momentuan edozein lanpostutarako prestatuta egon behar garelako. Mundukidek praktikak Arrasaten bertan egiteko aukera ematen zidanez gain, gobernuz kanpoko erakunde bat izanik ekimena ezagutzeko kuriositatea piztu zitzaidan.

Zer nolako lekua hartzen du Gobernuz Kanpoko Erakunde baten komunikazio esparruak?

Komunikazioak, ezagutzera ematen zaitu, eta ezinbestekoa da gobernuz kanpoko erakunde batentzako. Elkarteak dituen helburuak, egiten duen lana eta beste gauza asko oso argi utzi behar zaizkio publikoari. Horretarako makinatxo bat ekimen antolatzen dira, jaurdunaldiak, aurkezpenak, bideoak, etab…Internet eta sare sozialak ere ezinbesteko bihurtu dira ahalik eta jende gehiagorengana heldu ahal izateko.

Ezinbesteko zein ezaugarri trasmititu beharko lituzke gobernuz kanpoko erakunde batek?

Nire ustez gobernuz kanpoko erakunde batek erakutsi beharko lukeen ezaugarririk garrantzitsuena konfiantza da. Pertsonek eta erakundeek elkartearekin bat egin ahal izateko klabea da. Hala ere, badaude beste ezaugarri asko konfiantza hori izaten elikatzen dutenak: profesionaltasuna, gertutasuna, gardentasuna,…

IKOn ikasten ari zarena, erabilgarria da Mundukideko komunikazio lanetarako?

Noski. Unibertsitatean jasotako zenbait ezagutza, teknikoak batez ere, ezinbestekoak dira. Adibidez, kazetaritza, sare sozialak, bideo eta argazki edizioa…, hauen gaineko ezagutzarik gabe ezingo nuke nagoen tokian ezer egin. Hala ere, praktiketan askoz ere gehiago ikasten da, unibertsitatean ikasitakoa praktikan jartzeaz gain, beste ezagutza asko garatzen dituzulako. Hori MUk badaki eta nahiko presente dauka. Izan ere, MUn praktikak beharrezkoak dira eta ikasketa prozesuan sartzen dira, izan ere,120 kreditu bete behar dira praktikak gainditzeko.

Zelan azalduko zenieke MUko ikasleei zer den eta ze lan egiten duen Mundukidek?

Mundukideren helburua, herrialde pobretuen garapen sozioekonomikoa indartzea da. Horretarako Arrasateko kooperatibismoak eman duen esperientzia, jakintza eta baliabideak partekatzen dira.

Bestalde, MUko komunikazioko zein beste graduetako ikasleak Mundukidera gerturatzen animatuko nituzke,boluntario moduan, praktikagile edo kurtso bukaerako proiektugile gisa. Izan ere, esperientzia oso ona da norberarentzat eta elkarteari laguntzeko modu bikaina da.

MUNDUKIDEren sare sozialetan esandakoak

  • O churrasco
  • Cooperativistas de MONDRAGON en cooperación con Mundukide
  • Cooperativistas de MONDRAGON en cooperación con Mundukide
  • Voluntarios de LKS auditores colaboran en el proyecto de Marrupa